Registrerte arbeidsledige blant innvandrere (avsluttet i Statistisk sentralbyrå), 3. kvartal 1999

Ved utgangen av august i år var det registrert 10 066 arbeidslause førstegenerasjonsinnvandrarar. Dette gjev ein arbeidsløyseprosent på 7,9. Denne ligg 5 prosentpoeng høgare enn arbeidsløysa for heile befolkninga.

Grunna endringar i definisjonen av registrerte heilt arbeidslause frå 1999 har vi ikkje sikre endringstal for innvandrarar. Utrekningar som byggjer på Arbeidsdirektoratet sin korrigering av brotet i tidsserien tyder på at det var om lag 250 fleire registrerte heilt arbeidslause innvandrarar 3. kvartal 1999 enn same kvartal året før.

Den registrerte arbeidsløysa ved utgangen av august i år var høgast for innvandrarane frå Afrika, med 15,3 prosent, fylgt av innvandrarane frå Aust-Europa og Asia med respektive 11,5 og 11,1 prosent. Vestlege innvandrarar hadde berre nokre få tidelar høgare arbeidslause enn heile folket. Det same mønsteret fann vi i tala for mai månad i år.

Ved utgangen av august i år var den registrerte arbeidsløysa for innvandrarar 7,6 prosent for kvinner og 8,1 prosent for menn.

Færre på tiltak

Ved utgangen av august i år var det registrert 1 658 innvandrarar på ordinære arbeidsmarknadstiltak. Det svarar til ei halvering i forhold til tala for august månad året før. 34,8 prosent av alle på ordinære arbeidsmarknadstiltak er innvandrarar.

Ei om lag tilsvarande halvering i talet på personar på tiltak finn vi òg for heile befolkninga i same perioden.

Høgast arbeidsløyse i Østfold og Sør-Trøndelag

Statistisk sentralbyrå reknar òg ut registrerte arbeidslause i prosent av alle innvandrarar i yrkesaktiv alder (16-74 år) og ikkje berre i prosent av arbeidsstyrken. Talet på registrerte arbeidslause ikkje-vestlege innvandrarar i prosent av alle innvandrarar 16-74 år var ved utgangen av august i år høgast for busette i Østfold og Sør-Trøndelag og lågast for dei i Akershus og Oslo.

Blant dei ikkje-vestlege innvandrarane er det busette i Telemark, Østfold og Hedmark som hadde den høgaste prosenten på arbeidsmarknadstiltak i mai 1999. Ikkje-vestlege innvandrarar busett i Rogaland og Finnmark hadde lågast tiltaksprosent.

Statistikken kjem ut fire gonger i året.

Tabeller:

• Tabell 1 Registrerte heilt arbeidslause i alderen 16-74 år, etter landbakgrunn og kjønn. Absolutte tal og i prosent av arbeidsstyrken. Utgangen av mai 1998, august 1998, mai 1999 og august 1999
• Tabell 2 Personar på ordinære arbeidsmarknadstiltak, etter landbakgrunn og kjønn. Absolutte tal og i prosent av personar i alt 16-74 år. Utgangen av mai 1998, august 1998, mai 1999 og august 1999
• Tabell 3 Registrerte heilt arbeidslause og personar på ordinære arbeidsmarknadstiltak, etter landbakgrunn og tal år busett i Noreg. I prosent av personar i alt 16-74 år. Utgangen av august 1998 og 1999
• Tabell 4 Registrerte arbeidslause, etter landbakgrunn og bustadfylke. Absolutte tal og i prosent av personar i alt 16-74 år. Utgangen av august 1999
• Tabell 5 Registrerte på ordinære arbeidsmarknadstiltak, etter landbakgrunn og bustadfylke. Absolutte tal og i prosent av personar i alt 16-74 år. Utgangen av august 1999