Innhald
Publisert:
Du er inne i ei arkivert publisering.
2,8 millionar Internett-abonnement
Det var ved utgangen av 1. kvartal 2002 knapt 2,8 millionar Internett-abonnement i Noreg. Abonnementa fordelte seg på om lag 140 000 bedriftsabonnement og vel 2,6 millionar privatabonnement. Det fanst i alt vel 50 000 abonnement med breiband via kabel, ADSL eller liknande.
Det er fyrste gong Statistisk sentralbyrå publiserer denne statistikken. Det er difor ikkje mogleg å syna utviklingstrekk. Tala byggjer på opplysningar frå leverandørar av Internett-tilgang. For meir informasjon om populasjonen sjå i "Om statistikken".
Sterk marknadskonsentrasjon
Dei største Internett-leverandørane har ein dominerande posisjon i marknaden. Internett-leverandørar med minst 100 000 abonnement gav tilgang til Internett til om lag 90 prosent av privatmarknaden. Det er også sterk marknadskonsentrasjon i bedriftsmarknaden. Internett-leverandørar med minst 10 000 abonnement gav Internett-tilgang til om lag 80 prosent av bedriftsmarknaden.
Mest breiband i byane
Oslo og andre fylke med tett busetnad har mest breiband. I denne statistikken vert breiband rekna som Internett-abonnement med overføringskapasitet (fart inn) høgare enn 384 Kbit per sekund. Det finst færre abonnement med denne overføringskapasiteten i fylke med spreidd busetnad. Den geografiske utbreiinga av breiband er mellom anna knytt til høvet til å ta i bruk teknologiar som kabel, ADSL eller liknande.
Abonnementstala inneheld også abonnement som ikkje har vorte brukt i løpet av det siste kvartalet. Det er ikkje eit direkte samsvar mellom mengda abonnement og talet på bedrifter og personar med Internett-tilgang. For meir informasjon sjå i "Om statistikken". Statistikken vil etter kvart inkludera variablar som skildrar bruken av Internett. Det er ei målsetjing å publisera tal på eit meir detaljert regionalt nivå.
Tabeller:
Kontakt
-
SSBs informasjonstjeneste
E-post: informasjon@ssb.no
tlf.: 21 09 46 42