Aktivitet i sentrumssoner, 1. januar 2013

Folk vel i stadig aukande grad å bu urbant. Det er òg eit politisk ønske å nytte tettstadsarealet så godt som råd for å minke presset på areala i nærleiken Samstundes ønskjer ein å leggje til rette for å minimere transportmengda mellom bustad, arbeid og eit variert tenestetilbod.

Bur og arbeider tettare

Talet på tilsette i sentrumssoner har stige svakt frå 2008 til 2013. Det er om lag dobbelt så mange tilsette som busette i sentra.

Det bur nær 4 000 innbyggjarar per km ² i sentra, og dette er nær uendra det siste året.

Dei siste fem åra har auken av busette i sentrum vore 11 prosent for heile perioden, medan tettleiken av tilsette har vore nær uendra.

Det har vorte opp mot 7 prosent fleire busette i heile landet dei siste fem åra, samstundes har det vore ein oppgang på 18 prosent i sentra.

Tettare i dei store tettstadene

Det er fleire tilsette enn busette per km ² for alle storleiksklassene. Tettleiken av både busette og tilsette i sentrumssoner aukar med storleiken på tettstadene. I dei større tettstadane er det nær fem gonger så mange tilsette og busette per km ² som i bygdesentra. Berre sentra i dei største tettstadene har hatt vekst i både areal, busette og tilsette frå 2008 til 2013. Tettleiken av busette har auka i alle tettstadklassene.

Det er ikkje gitt at gruppene inneheld dei same tettstadene frå år til år. Etter kvart som tettstadene veks, kjem dei over i andre grupper.

Delen omsetnad i sentrum og tettstad kan seie noko om transport og forureining

Det er òg i år laga tal for miljøindikatorane: Detaljvareomsetnaden i hovudsentra og tettstad som del av detaljvareomsetnaden i kommunen. Dersom meir varehandel skjer i sentrale og konsentrert busette område, og ikkje i spreitt utbygde strok eller på kjøpesenter utanfor busette strok, vil det kunne føre til mindre transport og utslepp. Statistikken er utarbeidd for dei kommunane der datagrunnlaget er godt nok.