Oslo og Bærum på husleigetoppen

Gjennomsnittleg årleg husleige per kvadratmeter for ein toroms i Oslo og Bærum kommune er om lag 2 910 kroner, syner nye tal frå Leigemarknadsundersøkinga (LMU). ¹

Dette er om lag 33 prosent høgare enn for landet generelt. Også i Bergen og Trondheim er gjennomsnittleg husleige per kvadratmeter høgare enn landsgjennomsnittet, medan Stavanger trekker landsgjennomsnittet ned.

Stavanger hadde tidlegare eit relativt høgt leigenivå, men har vist ein fallande trend dei siste åra. Endringa i Stavanger frå i fjor er relativt flat; store bustader går noko opp i husleige, medan små bustader går noko ned.

Generelt er det store skilnader mellom bygd og by. Gjennomsnittleg husleige for ein treroms i tettstader med meir enn 20 000 innbyggjarar er om lag 38 prosent høgare enn den er for ein tilsvarande bustad i tettstader med mellom 200 og 1999 innbyggjarar.

Det er også skilnader i leigenivået ut frå lengda på leigeforholdet. Husleiga for leigeforhold inngått i år eller i fjor ligger i gjennomsnitt på 10 910 kroner, medan husleiga for leigeforhold som vart inngått for meir enn seks år sidan i snitt ligger på 8 410 kroner. Dette tyder på at større endringar i husleiga gjerne skjer i forbindelse med etablering av nye kontraktar.

 

 ¹ Retting i avsnittet kl 08.34.