Produksjonsauken i industrien held fram

Indeksnivået for industriproduksjonen var på 118,3 (2005=100) i perioden november 2018-januar 2019 mot 116,8 i føregåande tremånadersperiode. Dette er det høgaste indeksnivået registrert sidan 2. kvartal 2015. Den langsiktige trenden viser no ein oppgang sidan tidleg i 2018, som også kjem fram i  figur 1.

Tremånadersendring: svært høg aktivitet i petroleumsretta leverandørindustri

Sesongjusterte tal viser at industriproduksjonen hadde ein klår auke på 1,3 prosent i perioden november 2018-januar 2019 samanlikna med førre tremånadersperiode. Veksten kan i sær knytast til ein auke på over 10 prosent innanfor bygging av skip og oljeplattformer. I denne tremånadersperioden var det særleg høg aktivitet blant produsentar av oljeplattformer som bidrog til auken. I tillegg bidrog også metallvareindustrien og maskinreparasjon og -installasjon positivt. Samla sett hadde den petroleumsretta leverandørindustrien ein merkbar  produksjonsauke på 4,8 prosent.

På den motsette sida, ble den samla oppgangen i industrien dempa av lågare produksjon i kjemiske råvarer. Dette heng saman med driftsstans hos nokre sentrale aktørar.

Månadsendring: uendra industriproduksjon frå desember til januar

Sesongjusterte tal viser at den samla industriproduksjonen var tilnærma uendra frå desember 2018 til januar 2019, med eit lite fall på 0,2 prosent. På næringsnivå var det derimot store forskjellar. Næringsgruppa oljeraffinering, kjemisk og farmasøytisk industri saman med papir- og papirvareindustrien opplevde eit klårt fall. På den andre sida, hadde næringsmiddelindustrien og  bygging av skip og oljeplattformer ein tydeleg vekst.

Tydeleg nedgang i eurosona, auke i Noreg i desember 2018

Estimerte tal frå Eurostat, statistikkontoret i EU, viser at industriproduksjonen i land i eurosona hadde ein klår nedgang på 1 prosent frå november til desember 2018. I den same perioden var det ein produksjonsauke i Noreg på 0,6 prosent.

To av nabolanda våre, Sverige og Danmark, hadde begge ein tydeleg oppgang i industriproduksjonen i den same perioden.

Tremånadersendring: tydeleg nedgang i den samla produksjonsindeksen

Produksjonsindeksen for olje- og gassutvinning, industri, bergverksdrift og kraftforsyning samla (PII) hadde ein tydeleg nedgang på 2,1 prosent i perioden november 2018-januar 2019 samanlikna med førre tremånadersperiode, viser sesongjusterte tal. Utvinning av råolje gjekk opp med 0,6 prosent, medan utvinning av naturgass fall med så mykje som 8,2 prosent. For fleire detaljar om olje- og gassproduksjonen i januar 2019 sjå pressemelding frå Oljedirektoratet.

Utvinningstenester på si side hadde ein tydelig auke på 4,2 prosent i perioden november 2018-januar 2019 samanlikna med førre tremånadersperiode. Veksten heng mellom anna saman med høgare investeringsaktivitet i den norske olje- og gassnæringa.

Bergverksdrift hadde òg ei positiv utvikling i den same perioden og auka med 1,1 prosent, medan produksjon i norsk kraftforsyning gjekk ned med 4,5 prosent.