Marginal auke i industriproduksjonen

Indeksnivået for industriproduksjonen var på 115,3 (2005=100) i perioden mai–juli 2018 mot 114,8 i føregåande tremånadersperiode.

Tremånadersendring: auke i næringsmiddelindustrien

Sesongjusterte tal viser at industriproduksjonen hadde ein liten auke på 0,4 prosent i perioden mai-juli 2018, samanlikna med førre tremånadersperiode. Veksten kan særleg knytast til ein auke i næringsmiddelindustrien og i næringsgruppa oljeraffinering, kjemisk og farmasøytisk industri. Førstnemnde opplevde ein auke på 2,6 prosent, som mellom anna har samanheng med høg produksjon innan foredling og konservering av fisk. Sistnemnde gjekk opp 2,9 prosent.

På den motsette sida bidrog mellom anna dataindustri og elektrisk utstyrsindustri saman med maskinindustrien til å dempe oppgangen i samla industriproduksjon i perioden, med nedgang på høvesvis 2,3 og 2,8 prosent.

Månadsendring: oppgang i industriproduksjonen

Sesongjusterte tal viser at den samla industriproduksjonen gjekk opp 0,9 prosent frå juni til juli 2018. Det var næringsgruppa oljeraffinering, kjemisk og farmasøytisk industri som bidrog mest til denne auken. På den motsette sida bidrog fleire av næringane innanfor den petroleumsretta leverandørindustrien til å dempe oppgangen, som mellom anna dataindustri og elektrisk utstyrsindustri samt maskinindustrien.

Nedgang i industriproduksjonen i eurosona i juni 2018

Estimerte tal frå Eurostat, statistikkontoret i EU, viser at industriproduksjonen i land i eurosona hadde ein nedgang på 0,7 prosent frå mai til juni 2018. I same periode var produksjonen i Noreg tilnærma uendra, viser sesongjusterte tal.

To av nabolanda våre, Sverige og Danmark, hadde begge ein marginal produksjonsauke frå mai til juni 2018, opp 0,2 og 0,3 prosent høvesvis.

Tremånadersendring: marginal oppgang i den samla produksjonsindeksen

Produksjonsindeksen for olje- og gassutvinning, industri, bergverksdrift og kraftforsyning samla (PII) hadde ein liten oppgang på 0,3 prosent i perioden mai-juli 2018 samanlikna med førre tremånadersperiode, viser sesongjusterte tal. Utvinning av råolje hadde ein nedgang på 1,6 prosent, medan utvinning av naturgass auka med solide 8,5 prosent. For fleire detaljar om olje- og gassproduksjonen i juli 2018 sjå pressemelding frå Oljedirektoratet.

Innanfor utvinningstenester var det ein oppgang på 2,2 prosent i perioden mai-juli 2018 samanlikna med førre tremånadersperiode. Bergverksdrift gjekk ned 2,5 prosent i den same perioden, medan produksjonen innanfor norsk kraftforsyning hadde eit kraftig fal på heile 11,8 prosent. Nedgangen i kraftforsyning skuldast mellom anna lite nedbør. For fleire detaljar om produksjonen i norsk kraftforsyning i 2. kvartal, sjå pressmelding frå NVE.