Flat utvikling i industriproduksjonen

Indeksnivået for industriproduksjonen var på 119,5 (2005=100) i perioden september-november 2019 mot 119,4 føregåande tremånadersperiode. Den langsiktige trenden visar at etter ein jamn auke sidan mai 2018, har industriproduksjonen flata ut dei siste månadene (sjå figur 1).

Tremånadersendring: bygging av skip og oljeplattformar fortsett auken

Sesongjusterte tal viser at industriproduksjonen var tilnærma uendra i perioden september-november 2019 samanlikna med førre tremånadersperiode. Det var bygging av skip og oljeplattformar som bidrog mest i positiv retning, med ein vekst på 3,9 prosent. Næringa fortsett med det ein nesten uavbrote produksjonsvekst som har heldt fram sidan starten av 2018. Næringsmiddelindustrien opplevde òg ein auke samanlikna med førre tremånadersperiode. 

På den motsette sida dempa metallindustrien samt næringsgruppa gummi, plast og mineralsk industri den samla produksjonsutviklinga, med ein nedgang på høvesvis 2,3 og 2,4 prosent. 

Månadsendring: marginal nedgang frå oktober til november

Sesongjusterte tal viser at industriproduksjonen hadde ein marginal nedgang frå oktober til november 2019 på 0,4 prosent. Det var næringsmiddelindustrien som bidrog mest til nedgangen, medan bygging av skip og oljeplattformer opplevde produksjonsvekst og bidrog til å dempe den samla produksjonsnedgangen.

Liten produksjonsnedgang i Eurosona i oktober 

Estimerte tal frå Eurostat, statistikkontoret i EU, viser at den samla industriproduksjonen i land i eurosona gjekk ned med 0,5 prosent frå september til oktober 2019. I den same perioden var industriproduksjonen i Noreg tilnærma uendra. Både Sverige og Danmark hadde også nedgang i industriproduksjonen i perioden, med høvesvis 1,9 og 0,6 prosent.

For fleire nøkkeltal om europeisk næringsliv, sjå Eurostats nye informasjonsside om europeisk økonomisk statistikk.

Tremånadersendring: produksjon frå nytt oljefelt bidrog til oppgang i den samla produksjonsindeksen

Produksjonsindeksen for olje- og gassutvinning, industri, bergverksdrift og kraftforsyning samla (PII) hadde ein oppgang på 2,5 prosent i perioden september-november 2019 samanlikna med førre tremånadersperiode, viser sesongjusterte tal. Utvinning av råolje hadde ein klår auke på om lag 18 prosent, som mellom anna kan knytast til produksjonsstart ved eit nytt oljefelt i denne perioden. Utvinning av naturgass gjekk på si side ned med nesten 16 prosent. For fleire detaljar om olje- og gassproduksjonen i denne tremånadersperioden sjå pressemelding frå Oljedirektoratet.

Utvinningstenester hadde ein klår auke på 4 prosent i perioden september-november 2019 samanlikna med tremånadersperioden før. Veksten heng mellom anna saman med høgare investeringsaktivitet i den norske olje- og gassnæringa.

Bergverksdrift hadde ein nedgang på 2,3 prosent, medan norsk kraftforsyning hadde ein produksjonsauke på 2,2 prosent i denne perioden.