Obligasjonar og sertifikat, 2014

Ved utgangen av 2014 var samla pålydande verdi av den innanlandske obligasjonsgjelda på 1 728,4 milliardar kroner. 127 milliardar kroner av gjelda var i utanlandsk valuta - heile 30 prosent meir enn ved utgangen av 2013. To tredelar av veksten i slik gjeld kjem på grunn av fall i kronekursen. Det meste av gjelda i utanlandsk valuta er teken opp av utlendingar. Fallet i kronekursen ga ein vekst i samla gjeld frå obligasjonar som er emitterte i Noreg på vel 1 prosent. Resten av gjeldsveksten kjem av fleire emisjonar enn innløysingar.

Stor variasjon i sikkerheit for gjelda

Det er stor variasjon når det gjeld sikring av gjelda frå obligasjonane som er emitterte i Noreg. 42 prosent av gjelda er ikkje sikra. 21 prosent av gjelda har ein garanti frå offentleg forvaltning - i hovudsak staten - mens 27 prosent av gjelda er obligasjonar med førerett. 2 prosent av gjelda er ansvarleg lånekapital. Resten av gjelda er sikra på ein annan måte.

Meir gjeld til offentleg forvaltning og utlendingar

Ved utgangen av 2014 hadde andre finansielle føretak enn bankar den største delen av obligasjonsgjelda, med 29 prosent. Den nest største delen hadde offentleg forvaltning med 24 prosent. Den samla gjelda til andre finansielle føretak gjekk ned med 7 prosent i 2014, mens gjelda som høyrer til offentleg forvaltning, gjekk opp med heile 20 prosent. Bankane hadde den tredje største delen av obligasjonsgjelda på dette tidspunktet: 17 prosent. 15 prosent av gjelda frå obligasjonar som er emitterte i Noreg ved utgangen av 2014, var teken opp av utlendingar, mot 14 prosent eit år tidlegare.

Marknadsverdiane voks ytterlegare i 2014

Mens marknadsverdiane på obligasjonar som er emitterte i Noreg i dei fleste høva var mindre enn dei pålydande verdiane i perioden 2008 – 2010, har det vore omvendt sidan 2011. Marknadsverdien av samla innanlandsk obligasjonsgjeld har vakse ytterlegare, og låg i snitt 2,6 prosent over den pålydande verdien av gjelda ved utgangen av 2014, mot om lag 2 prosent over dei pålydande verdiane ved utgangen av dei to føregåande åra. Dette var en gjennomsnittsverdi for både børsnoterte og ikkje-børsnoterte obligasjonar, som kan vere ulikt prisa. I 2014 var marknadsverdien for børsnoterte obligasjonar heile 6,9 prosent over pålydande verdi. Marknadsverdien for ikkje-børsnoterte obligasjonar var derimot 1 prosent under den pålydande verdien.

Marknadsverdiane låg gjennomgåande noko under dei pålydande verdiane på obligasjonar som har vore emitterte av private føretak og utlendingar, mens dei var høgare enn dei pålydande verdiane for andre obligasjonar. Spesielt høg var marknadsverdien for obligasjonar som er emitterte av stats- og trygdeforvaltninga: i snitt 9 prosent over den pålydande verdien.

Moderate emisjonsvolum i 2014

I Noreg blei det emittert obligasjonar for i alt 412 milliardar kroner i 2014. Dette er ein vekst i emisjonsvolumet på 1 prosent frå 2013. I den same perioden blei det registrert innfriingar av obligasjonslån for totalt 340 milliardar kroner.

Kredittføretak låner framleis meir enn andre

Fordelinga av låneopptak har vore nokså stabil dei siste åra. Kredittføretaka tok som tidlegare opp mest obligasjonslån i Noreg, med eit lånebeløp på 102,9 milliardar kroner i 2014. Bankane tok opp det nest største lånebeløpet: 73,0 milliardar kroner. Det tredje største lånebeløpet, 72,0 milliardar kroner, blei teke opp av stats- og trygdeforvaltninga. Som tidlegare tok òg utlendingar opp ein betydeleg del obligasjonslån i Noreg: 66,2 milliardar kroner.

Tabell: Obligasjonar som er emitterte i Noreg 31. desember 2014. Sortert etter ISIN (xls-fil)