Teikn på betre tider i industrien

Indeksnivået for industriproduksjonen var på 113,5 (2005=100) i perioden desember 2016-februar 2017, mot 112,1 i tremånadersperioden før.

• Sjå fleire tal og tabellar i statistikken Produksjonsindeks for olje og gass, industri, bergverk og kraftforsyning

Tremånadersendring: oppgang i oljeraffinering, kjemisk og farmasøytisk industri

Sesongjusterte tal viser ein oppgang i industriproduksjonen på 1,2 prosent i perioden desember 2016-februar 2017 samanlikna med den føregåande tremånadersperioden. Næringsgruppa oljeraffinering, kjemisk og farmasøytisk industri bidrog mest til den totale veksten med ein klår auke på 6,1 prosent. Høg produksjon av farmasøytiske produkt, i tillegg til vedlikehaldsstans hos toneangivande produsentar i den førre tremånadersperioden forklarer denne veksten. Det var òg ein tydeleg auke innanfor dataindustri og elektrisk utstyrsindustri grunna høg produksjon av elektrisk utstyr.

Samstundes bidrog oljerelaterte næringar som maskinindustri og metallvareindustri til å dempe oppgangen i den samla industriproduksjonen. For fleire detaljar om utviklinga i norsk petroleumsretta leverandørindustri i dei seinare åra sjå artikkelen Oljeinvesteringenes dominerende effekt på industriproduksjonen.

Månadsendring: Uendra industriproduksjon frå januar til februar 2017

Sesongjusterte tal viser at industriproduksjonen var uendra frå januar til februar 2017. I denne perioden hadde næringsmiddelindustrien og metallindustrien ein oppgang. På den andre sida hadde dataindustri og elektrisk utstyrsindustri saman med møbelindustrien eit fall i den same perioden.

Tolvmånadersendring: liten nedgang i både Noreg og eurosona i januar 2017

Kalenderjusterte tal viser at norsk industriproduksjon gjekk ned 0,8 prosent frå januar 2016 til januar 2017. Maskinindustrien var næringa som bidrog mest til denne nedgangen med eit fall på heile 19 prosent. Estimerte tal frå Eurostat, statistikkontoret i EU, viser at industriproduksjonen i land i eurosona hadde ein liten nedgang på 0,3 prosent i den same perioden.

Tremånadersendring: tydeleg vekst i den samla produksjonsindeksen

Sesongjusterte tal viser at produksjonsindeksen for olje- og gassutvinning, industri, bergverksdrift og kraftforsyning samla (PII) auka med 3,1 prosent i perioden desember 2016-februar 2017 samanlikna med den føregåande tremånadersperioden. Utvinning av råolje hadde ein nedgang på 1,6 prosent, medan utvinning av naturgass hadde ein klår oppgang på 9,6 prosent. For fleire detaljar om olje- og gassproduksjonen i februar 2017 sjå pressemelding frå Oljedirektoratet.

Innanfor utvinningstenester var det ein tydeleg nedgang i produksjonen på 3,4 prosent i perioden desember 2016-februar 2017 samanlikna med den føregåande tremånadersperioden. Verksemdene innanfor denne næringa vert mellom anna ramma av lågare investeringsaktivitet i olje- og gassektoren. Det er særleg lågare investeringar innanfor kategorien leiting som bidrog til å redusere produksjonsaktiviteten i næringa.

Bergverksdrift hadde på si side ein oppgang på 1,6 prosent i den same perioden, medan produksjon innanfor norsk kraftforsyning var uendra.